cookies आणि भिकारी

काल आम्ही चौघी ऑफिसनंतर दिवाळी शॉपिंगला गेलो होतो.
काहीच नाही आवडलं तसं मी आणि राधिका बाहेर येऊन थांबलो.
तर समोर प्रसिध्द 'cookie man' चा स्टॉल. खाल्ल्या मग. एक cookie रु.२५ फक्त. एकूण १०० रुपयाच्या खाल्ल्या.
मी राधिकाला म्हणलं पण. आईला कळलं तर म्हणेल, १०० रुपयाची बिस्कीटं गं कसली खाता? आहे म्हणून हे असे उधळायचे का? पेक्षा सत्कारणी लावा.

घरी परत येताना गाडी सिग्नलला थांबली. नेहमीसारखी १-२ छोटी पोरं खिडकीच्या काचेवर टकटक करू लागली.
ताई भूक! मीदेखील नेहमीसारखंच दुर्लक्ष केलं. पुढे जा...

रात्री दिवसाचा पाढा वाचताना सुहासला म्हणलं, अरे ते 'cookie man' पुण्यात आलंय, अमूक mall मधे. काय सही cookies आहेत. १०० रुपयाच्या खाल्ल्या.

आणि आजकाल भिकारी पण किती झालेत ना सिग्नलला !